စာရေးသူတို့သည် ဘ၀မျိုးမျိုးစုံနေရာမျိုးစုံ၌ သွားလာလှုပ်ရှားနေကြရသည်။ ထိုသို့လှုပ်ရှားရုန်းကန်နေကြရာတွင် အတွေ့အကြုံ မျိုးစုံကိုလည်းတွေ့ကြုံခံစားကြရသည်။ မိမိတို့ကြိုက်သည်ဖြစ်စေ မကြိုက် သည်ဖြစ်တွေ့ကြုံနေရမည်သာဖြစ်သည်။ အတွေ့အကြုံသည် မိမိတို့ကျင်လည်ရာပတ်ဝန်းကျင်ကိုလိုက် ၍ အမျိုးမျိုးရှိနိုင်သည်။ မိမိတို့တွေ့ကြုံရသော အတွေ့အကြုံတို့သည်ဝမ်းနည်းမူ့ဝမ်းသာမူ့ရသ အမျိုးမျိုးခံစားမူ့အမျိုးမျိုးကို ပေးနိုင်သည်။ ကြုံတွေ့ခံစားခဲ့ရသောဝမ်းနည်းစရာ မေ့ပြောက်အောင်ကြီုး စားသော်လည်း မိမိရင်ထဲမှာကျန်ခဲ့ တတ်သည်။ တိုက်ဆိုင်မူ့များရှိသောအခါပြန်လည်း သတိယတတ် သည်။ ၀မ်းသာစရာများကိုတော့ အမြဲတမ်းအမှတ်ရခြင် တမ်းတခြင်ကြသည်။ ၀မ်းနည်းမူ့လည်းမဟုတ် ၀မ်းသာစရာလည်းမဟုတ် သို့သော် မိမိရင်ထဲစွဲကျန်ခဲ့သော အကြောင်းအရာများစွာတို့လည်းရှိတတ် ကြသည်။
စာရေးသူဘ၀တွင် ၀မ်းနည်းစရာမဟုတ် ၀မ်းသာစရာမဟုတ်၊ သို့သော်ရင်ကိုထိမှန်ရိုက်ခိုက်ခဲ့သော ကဗျာများစွာရှိခဲ့ပါသည်။ ထိုကဗျာများစွာထဲမှ ကဗျာတပုဒ်ကို စာဖတ်သူများနှင့်မျှဝေခံစားလိုပါသည်။ ကဗျာဆရာမှာ မြန်မာသမိုင်းတွင်ထားရှားခဲ့သော ထင်ရှားလတ္တံ့သော ဆရာဇော်ဂျီဖြစ်သည်။ ကဗျာက ခေါင်းစဉ်က သင်သေသွားသော်-တဲ့။ ကဗျာကို ဆရာကသည်လိုစခဲ့ပါသည်။ -
သြော်
လူ့ ပြည်လောက လူ့ ဘ၀ကား
အိုရ နာရ သေရဦးမည်
မှန်ပေသည်တည့်။
လူသားတယောက်ဖြစ်လာဖြစ်လာပြီဆိုရင် ဇာတိ-ဖြစ်လာပြီဆိုလျှင် သူ၏အဖေါ်အိုခြင်းတရား-ဇရာ၊ နားခြင်းတရား-ဗျာဓိ၊ သေခြင်းတရား-မရဏ တို့သည်ကပ်ပါလာသည်။ ထိုတရားတို့သည်မည်သူမျှ ရှောင်လွဲမရနိုင်သော အမှန်တရား-ပရမတ္ထသစ္စာတို့ဖြစ်သည်။ ထိုအမှန်တရား-ပရမတ္ထသစ္စာကို အမှတ်ရနေဘို့ရန် ဆရာကအစဦးမှာပင်သတိပေးခဲ့သည်။ ထိုအမှန်တရားတို့ကို စာရေးသူတို့ဘ၀တွင် တခါတရံမေ့နေတတ်သည်။ ငယ်စဉ်အခါက ခွန်အားဗလနှင့်ပြည့်စုံနေသောကြောင့် ဗလမာန်၊ စည်းစိမ်ချမ်းသာသော မိသားစုကကြီးပြင်းလာသောပုဂ္ဂိုလ်တို့များ၊ ရာထူးဌာနရှိသော ပုဂ္ဂိုလ်များမှာ ဂုဏမာန်၊ ပညာတတ်သောပုဂ္ဂိုလ်တို့မှာ ပညာမာန်၊ အသက်အရွယ်ရလာသောအခါ ၀ယမာန်၊ စည်းစိမ်ချမ်းသာသော ပုဂ္ဂိုလ်တို့မှာ ဘောဂမာန်၊ စသည်ဖြင့်အမျိုးမျိုးဖြစ်တတ်ကြသည်။ ထိုမာန်တို့ ဖြစ်နေသောပုဂ္ဂိုလ်တို့မှာ အိုခြင်းနာခြင်းသေခြင်းဟူသောပရမတ္ထသစ္စာကိုမေ့နေတတ်သည်။
သို့ ပြည်တကား သင်သေသွားသော်
သင်ဖွားသောမြေ သင်တို့ မြေသည်
အခြေတိုးမြင့် ကျန်ကောင်းသင့်၏
သင်၏မျိုးသား စာစကားလည်း
ကြီးပွားတက်မြင့် ကျန်ကောင်းသင်၏
အမှန်တရား-ပရမတ္ထသစ္စာကိုမေ့နေသော်လည်း နောက်ဆုံးသေခြင်းတရားကိုတော့မည်သူမျှမလွန်ဆန်နိုင်ပေ။ သေသွားခဲ့သော် မိမိတို့၏ဇာတိမြေတွင် ဖွံ့ဖြိုးတိုက်စွာကျန်ခဲ့ဘို့လိုပေသည်။ မိမိတို့သည်ဘယ်နေရာရောက် မည်သည့်နိုင်ငံ၌နေရစေကာမူ မိမိတို့၏မွေးဖွားရာဇာတိမြေဖြစ်သော အမိမြန်မာကိုတော့ ဘယ်တော့မှမမေ့အပ် ပေ။ မိမိတို့၏ ဘာသာစကား စာပေတို့သည်လည်းသည်ထက်ပို၍ တိုးတက်ရှင်သန်ကြီးထွားစေရန်မှာလည်း မိမိတို့၌တာဝန်ရှိပေသည်။ တချို့သောပုဂ္ဂိုလ်တို့သည် အခြားဖွံ့ဖြိုးတိုးတက်သော နိုင်ငံများသို့ရောက်နေသော် မိမိတို့၏ဘာသာစကား စာပေတို့ကိုမေ့နေတတ်သည်။ မိမိတို့ယဉ်ကျေးမူ့ဓလေ့ထုံးစံအစဉ်အလာများ၊ ဘာသာ စကား၊ စာပေတို့ကိုအထင်သေးတတ်သည်။ သို့သော်မိမိတို့နိုင်ငံ၏ ဘာသာစကား စာပေ ဓလေ့ထုံးစံတို့သည် နှစ်ပေါင်းထောင်ချီကစတင်ကာ ဖွံ့ဖြိုးတိုးတက်အဆင့်အတန်းမြင့်လှသည်။ နှစ်ပေါင်းများစွာအကြာက စတင်ကာ ခဲ့သော တန်ဘိုးမဖြတ်နိုင်သော သည်အမွေအနှစ်တို့ကို အဖိုးအဖွားဆရာသမားတို့က လက်ဆင့်ကမ်းသယ် ဆောင်ခဲ့ရာ မိမိတို့လက်ထက်တွင်ဆက်လက်ရှင်သန်ဘို့ရန်မှာ လွန်စာအရေးကြီးသည်။ ထိုကြောင့်မိမိတို့ သားသမီး တပည့်များအားလက်ဆင့်ကမ်းနိုင်အောင်ကြီုးစားကြရမည်။
သင်ဦးချ၍ အမျှဝေရာ
စေတီစာနှင့် သစ္စာအရောင်
ဥာဏ်တန်ဆောင်လည်း
ပြောင်လျက် ၀င်းလျက် ကျန်စေသတည်း.......။
ဆရာဇော်ဂျီ....
သည်အပိုဒ်၌လည်း ဆရာက မိမိတို့ကိုးကွယ်ဆည်းကပ်ခဲ့သော စေတီများ၊ နာယူမှတ်သားခဲ့ရသော တရား တော်များကို၊ ထိန်းသိမ်းစောက်ရန်တိုက်တွန်းထားသည်။ ၀ံသာနုရက္ခိတစိတ်ဓါတ်သည် လွန်စွာအရေးကြီး သည်။ အမျိုးအနွယ်ကိုစောင့်ရှောက် မိမိဘာသာတရားကိုစောင့်ရှောက်ထိန်းသိမ်းရန်မှာ မိမိတို့တာဝန်သာ ဖြစ်သည်။ ဆရာ၏ ကဗျာအရေးအသားသည်ထိမိလှသည်။ ဆရာ၏ကဗျာများကိုဖတ်ခြင်းဖြင့် သူ၏၀ံသာနု စိတ်ဓါတ်ကို ခန်းမှန်းနိုင်သည်။
လူလောက၌လူတယောက်ဖြစ်လျှင် တန်ဘိုးရှိသောလူတယောက်ဖြစ်လာရန်မှာလွန်စွာအရေးကြီးလှသည်။ မိမိအကျိုး သူတပါးအကျိုးတို့ကို ထမ်းဆောင်နိုင်သောပုဂ္ဂိုလ်တို့သည်သာ တန်ဘိုးရှိသောလူများဖြစ်သည်။ ဂေါတမဗုဒ္ဓသည် ဒီပင်္ကရာမြတ်စွာဘုရားလက်ထက်တော်အခါက သုမေဓာရသေ့ဖြစ်ခဲ့သည်။ အတ္တဟိတ အကျိုးတခုတည်းကိုသာ ကြည့်ပါက အဲဒီဘ၀တွင်ပင် အေးငြိမ်းရာနိဗ္ဗာန်သို့တက်လှမ်းနိုင်ပေသည်။ သို့သော် လက်တကမ်းသို့ရောက်နေသော အတ္တဟိတ-မိမိတဦးတည်းချမ်းသာသုခကိုစွန့်လွတ်လျက် အများချမ်းသာ-ပရဟိတ-အကျိုးကိုသာသယ်ပိုးနိုင်ရန် ဘ၀များစွာသံသရာမှာ ဆင်းရဲဒုက္ခကိုခံကာကြီုးစားခဲ့သည်။ ဘုရားဖြစ် သောအခါ၌လည်း ချမ်းသာသုခကိုသာခံစားမနေပဲ အချိန်ရှိသရွှေ့ အများအကျိုးကိုသယ်ပိုးဆောင်ရွက်ခဲ့သည်။ ထိုကြောင့်စာရေးသူတို့အားလုံးလူလောကကိုရောက်ရှိနေသောကြောင့် လူသားကောင်းကျိုး အများအကျိုး ဆောင်ရွက်ကာ မိမိ၏မြန်မာပြည်ကြီး၏ ဘာသာ၊ စာပေ၊ ယဉ်ကျေးမူ့ စသည်တို့ကိုထိန်းသိမ်းစောင့်ရှောက်ကြ ပါစို့ဟု တိုက်တွန်းပါရစေ။
No comments:
Post a Comment